octobre 23, 2021

Le Tout Au Pluriel Magazine

Nous sommes vos yeux et vos oreilles

INIFÒS NÒT POU LAPRÈS

3 min read
Partagez cet article
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

INIFÒS

NÒT POU LAPRÈS

Depi koumansman lane a, dapre pawòl ki te di alapapòt, pouvwa tèt kale a, opozisyon politik ansanm ak sosyete sivil la, t ap chita pale pou yo chèche jwenn yon solisyon pou wete peyi a lan kriz malouk k ap fini ak li a.

Apre anpil tolalito, fèsanblan, frape lestomak, Prézidan Jovenel Moïse ki te degize an patizan dyalòg, rale mask ki te maske figi l la, li moutre sa l ye, sa l te toujou ye. Yon anganman, yon bèt a sèt tèt. Li rale Premye Minis li anba zèsèl li, e l di peyi a : men lamayòt la m te sere pou nou.

Nou te di prezidan an, apre twa lane wap dirije peyi a, se kraze w kraze l. Fè yon ti poze, ann chache yon jan pou n leve l atè a, pou n mete l kanpe sou de pye l.

Nou te di w, se opozisyon politik ak sosyete sivil la k ap ba w yon premye minis ki soti lan opozisyon an pou nonmen, ou pa tande nou.

Nou te di w, se premye minis n ap bay la ki pou tabli politik peyi a, jere politik piblik yo ak tout zafè entèn peyi a, ou fè tankou w soud.

Nou te di w, lè w fin fè ti rès tan an ap okipe afè relasyon ak letranje, politik eksteryè peyi a, w ap bay demisyon w, le 7 fevriye 2021, ou pran pòz pa konprann ou.

Mouche Prezidan, ou te ban nou yon lapen, nou di w nou pap manje l. Ou te ban nou yon kabrit, nou di w nou pa bezwen ras sa a, gade l nan patiraj ou.

Kounye a, ou chwazi gwo ponyètman yon Premye Minis, n ap tou fè w konnen, ou pap ka fòse l desann lan gagann pèp ayisyen an.

Ou te di w vle dyalòg, chèf ou yo te vle dyalòg, nou te dakò pou n dyaloge ak ou. Men, se lestomak ou wap frape, se gwo bibit ou wap montre, nou di w jan w vini an, se jan n ap resevwa w.

Apre twa zan w pase sou pouvwa a,
– ou kraze ti ekonomi peyi a,
– ou fè goud la tounen zòrèy bourik,
– ou moute drapo pou bay lamizè ochan,
– ou batba devan koripsyon ak enpinite a,
– ou sitire bandi ak atoufè,
– ou kraze enstitisyon peyi a,
– ou fini nèt ak Leta.

Sa fè, lajounen jodi a, grangou ak lamizè ap taye banda, ensekirite blayi sou tout teritwa a. Kote moun pase, se volè, kidnapè, vyolè, asasen k ap fè lalwa.

Peyi a pa kapab ankò avè w.
Pèp la di w : li pa vle w.

*INIFÒS* deside makonnen fòs li ak tout moun k ap soufri, ki nan lamizè,
tout moun ki pèdi fanmi, lajan ak byen yo, lan move kondisyon,
tout moun ki ap viv nan kè sote ak afè ensekirite ki gaye nan peyi a,
tout moun ki bouke ak zafè koripsyon, enpinite a,
tout moun ki wè yo pa gen avni bò isit, toutotan se responsab ki pa alawotè ki alatèt peyi a.

Nou di: batay la fenk kòmanse !
Nou rele koukouwouj !
Koukouwouj dèyè yon Prezidan ki pase twa zan ap kraze brize, koukouwouj dèyè yon Prezidan ki konprann li ka pase de lòt ane ankò pou l ka fini nèt ak ti rès ki rete nan eritaj Dessalines nan.

Paul Denis
Tél:50937338028