octobre 28, 2021

Le Tout Au Pluriel Magazine

Nous sommes vos yeux et vos oreilles

Poukisa Ayisyen pa dwe pataje fo nouvèl (Fake News) sou Kowona Viris ?

2 min read
Partagez cet article
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

Fo Nouvèl sou Kowona Viris ka fè anpil dega. Sitou an Ayiti, nou deja ap viv nan yon peyi kote majorite popilasyon an refize pran prekosyon kont viris la, chak fwa yon sitwayen pataje yon fo nouvèl sou viris la ou fè plis moun pa kwè ke viris la danje e ou ankouraje moun ki refize pran prekosyon yo kontinye fè tèt rèd.

Se pa sèl Ayiti ki gen fo nouvèl sou viris la. Nan kèk peyi etranje, gen yon fo nouvèl ki san okenn sans k ap sikile nan moman an : kòmkwa se antèn 5G yo ki ta pwopaje viris la.

Tout syanntifik yo voye jete fo nouvèl sa. E daprè ekspè yo, li enposib teknikman e biyolojikman pou ond antèn 5G yo ta transmèt viris la.

Gen Ayisyen ki pran plezi tradui e pataje fo nouvèl sa yo sou rezo sosyal yo an Ayiti. M panse se yon gwo tò moun yo ap fè a peyi a. Sitou teyowi sa pa kanpe sou anyen ki serye.

Lè w gade sou Facebook ak WhatsApp, reyaksyon plizyè moun bay kè kase, tankou sitwayen sa ki fè kòmantè sa :

– Pa gen viris kowona vre, se antèn 5G yo kise kreyati satan ki bay moun maladi a. Lave men, rete lakay, mete mas se boulchet….

Mezanmi Kowona Viris la se yon maladi serye. Nou paka ap jwe avèl. Nou paka pwofite de li pou fè fo nouvèl pase. Se lavi plizyè milyon moun ki an danje.

Dayè Ayiti pa gen teknoloji 5 G. Pa gen okenn enterè pou pataje fo nouvèl sa ak Ayisyen.

Epi si n ta fè yon ti konsiderasyon : plizyè peyi kote kowona viris ap fè plis dega yo pa gen teknoloji 5G. E peyi ki lidè nan zafè 5G yo, pa gen anpil ka kowona.

Peyi tankou Iran, Sendomeng pa gen teknoloji 5 G men viris la ap ouvè kòl nan peyi sa yo. Tandiske Koredisid, Taywann, Sengapou ki gen teknoloji 5 G a pa gen anpil ka.

Ki donk kijan yon moun fè fè lyen ant Kowona ak 5 G?

Mezanmi, pa gen okenn lyen ant 5 G ak Kowona. Tout sa k ap fè mesaj sa yo sikile se moun ki gen foli fè bòz. Pa kite moun vire sèvèl nou ak move nouvèl sa yo. kontinye pran prekosyon pou n konbat kowona viris la.

GILBERT ALPHONSE
Enjenyè Enfòmatik.

La redaction de LTP

+50933264662
admin@letoutauplurielmagazine.com

16Avril 2020.

LE TOUT AU PLURIEL MAGAZINE! NOUS SOMMES VOS YEUX ET VOS OREILLES.