octobre 27, 2021

Le Tout Au Pluriel Magazine

Nous sommes vos yeux et vos oreilles

KRI FANM AYITI (KRIFA):Kominike pou laprès

2 min read
Partagez cet article
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

KRI FANM AYITI (KRIFA), yon òganizasyon k ap defann dwa fanm nans sosyete a salye desizyon FIFA pran poul retire Yves Jean Bart nan tèt federasyon fotbòl ayisyèn nan pou 90 jou.

KRIFA bat bravo lakontantman pou desizyon sila a ki se yon premye viktwa nan batay l’ap mennen pou limyè fèt sou akizasyon ki fè kwè Yves Jean Bart, prezidan federasyon an ta abize seksyèlman kèk ansyèn ak nouvo jwèz nan Ranch Kwadèboukè epi oblije yo avòte.

Nan nòt ki te soti nan dat 2 me 2020 an, KRIFA te mande pou yo retire doktè Yves Jean Bart nan tèt federasyon an nan lide pou pèmèt potansyèl viktim yo, paran yo ak pwòch yo pote plent lib e libè san yo pa santi yo menase. Nan dezyèm atik *The guardian* soti a li fè kwè gen anpil viktim ki ap resevwa menas pou yo pa pale. KRIFA ap mande pou lajistis peyi Dayiti ki deja sezi de dosye a mete sou pye prese prese yon pwogram pwoteksyon pou potansyèl viktim yo, temwen yo ak denonsiyatè yo.

KRIFA vle di tou, si nan 90 jou limyè pa rive fèt sou dosye sila a, mezi sispansyon FIFA pran nan dat 25 me 2020 sou baz atik 84 ak 85 kòd etik la dwe pwolonje. Nou pap dakò Yves Jean Bart tounen nan tèt federasyon an san lajistis pa deside sou dosye a.

KRIFA mande jij enstriksyon ki sezi dosye sila a poul kontinye ankèt li epi rann òdonans li nan delè lalwa fikse pou sa. Dosye sa pa ka ni ap trennen nan wout ni ap dòmi nan tiwa.

KRIFA salye travay komisyon etik FIFA mete sou pye a pandan lap ankouraje l kontinye ankete pou limyè rive blayi.

KRIFA renouvle angajman l pou akonpaye viktim yo e pote dosye sa devan pi gwo enstans ki egziste yo kit se nan peyi Dayiti oubyen lòt bò dlo. Li lè pou tout fanm ak ti fi santi yo lib pou chwazi evolye nan domèn yo vle san yo pa santi yo eksplwate.

KRIFA, pou respè dwa tout fanm ak tifi.

Kafou, 26 me 2020

Guerlyne RESIDOR
Kòdonatris jeneral
(509) 2945 0040
krifanmayiti@gmail.com
10. Mon repos 50, Kafou

Tous droits réservés, 26 Mai 2020.

LE TOUT AU PLURIEL MAGAZINE! NOUS SOMMES VOS YEUX ET VOS OREILLES.