Guy Wewe, Di Shoubou pou mwen, Si se mwen k te li m t ap pito rete Nouyòk - Le Tout Au Pluriel Magazine
mai 12, 2021

Le Tout Au Pluriel Magazine

Nous sommes vos yeux et vos oreilles

Guy Wewe, Di Shoubou pou mwen, Si se mwen k te li m t ap pito rete Nouyòk

2 min read
Partagez cet article
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

Guy Wewe,
di Shoubou pou mwen
pa tounen Ayiti poutèt Mirèy.
Pito li rete lavil Nouyòk,
viv ak Mirèy, Madanm li, menm nan lanmò,
olye l tounen lakay vin twoke kòn ak remò.
Remò lakay vo plis pase dimil lanmò.

Guy wewe,
di Shoubou pou mwen,
Mirèy di pou m di l
si li tounen Ayiti, lakay,
l ap mouri yon dezyèm fwa,
li p ap gen ase kouray
pou l wè lejand Shoubou
k ap benyen nan san ak labou mastisan,
trepase sou pil fatra santi lasalin,
ajenou douvan ti gang,
gwo gang nan Gran ravin.
Tanpri, Guy wewe,
di Shoubou pou mwen,
Madanm li di pou m di l
Kite Nouyòk pou lanmò l,
se chwazi sèkèy,
pito l rete Nouyòk viv ak yon fèy
Olye l tounen Ayiti.

Guy wewe,
di Shoubou pou mwen,
si li tounen lakay,
Nèg yo pral ofri li djòb minis,
jis pou pou yo ka krache sou karyè l
ak toupizi tout bèl mizik Tabou konbo yo.

Anmenmtan, Guy Wewe,
di Shoubou pou mwen:
prepare pou l tounen lakay, An Ayiti,
Se prepare repons pou plizyè kesyon,
Tankou:
Ou se moun pòtpè, pa vre?
Kisa ou fè pou pòtpè?
Ou fè yon karyè mizikal wo nivo, pa vre?
Nan ki nivo mizik la ye pòtpè?
Kote « fondasyon Shoubou » a ye nan pòtpè?
Shoubou, ou panse vizite vil natal ou, pa vre?
E sizoka maladi ta pran ou,
ki bò ou pral lopital, lejand?
Imakile?
Welele!
Ou mele.
E sizoka lapli ta bare ou pòtpè,
Kisa w ap fè?
Ou genyen chaloup?
Ou genyen bato?
Antouka, repons yo nan tèt ou,
Lejand Shoubou.

Guy Wewe,
Di Shoubou pou mwen,
Si se mwen k te li m t ap pito rete Nouyòk.
Di li pou l salye Jean Elie Telfort pou mwen.
Di pou l di Cubano pou mwen : »Yonyon pa mouri, Skasha te ka toujou egziste ak Yonyon. »

M ale!
Sonje m te di nou sa a.
Yo rele m Zicky, nèg andeyò,
Baton jenès la a.

Camoëns Daniel (Zicky)
Ekriven, Dizè, Konpozitè,
Anbasadè Kreyòl Ayisyen

Tel: (509) 3755 36 90/ 43489836
E-mail: camvensleya02@gmail.com