octobre 19, 2021

Le Tout Au Pluriel Magazine

Nous sommes vos yeux et vos oreilles

LÈZETAZINI se enterè l sèlman lap defann pandan lap destabilize peyi a.

4 min read
Partagez cet article
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

Yon editoryal Zephir ekri pou’l ede’n konprann sak te pase dan le tan e ki sanble klè kon de gout dlo ak jounen jodi a.

Envazyon ak okipasyon pa yon vizit amikal ant 2 peyi. Envazyon ak okipasyon pa fèt paske peyi agresè a ni damou pou peyi viktim nan ni vin pwoteje l. Envazyon ak okipasyon fèt pou fè jenosid, imilye ak piye richès peyi ke anvayisè yo mete jenou yo sou kou l la. Lè Lespay ak Vatikan te voye *Kristòf Kolon* (Kristobal Kolon) anvayi Ayiti, yo pa t voye asasen jenosidè a vin tete lang ak Tayino yo. Se sa k fè jounen jodi a, se pa Tayino yo ki peple Ayiti. Se plas yo nou pran, paske *Kristòf Kolon* nan tèt kole ak Lespay ak Vatikan te ekstèmine yo. Nou menm ayisyen, se paske teworis yo te kidnape zansèt nou yo sou tè Lafrik, ki fè se pèp sa a nou ye jodi a. Apre tout sakrifis zansèt nou yo te fè pou n pa t janm konnen doulè lesklavaj ak okipasyon menm jan avè yo, akòz vye anbisyon ak prejije *Petyon* ak tout lòt apatrid parèy li yo, Ayiti kite ray peyi endepandan e souvren, pou l retounen yon koloni ki gen plizyè peyi esklavajis k ap teworize l depi 214 lane. Sa vle di, depi apre zak sasinay sou papa nasyon an, Ayiti ap travèse yon peripesi san bout anba men tout teworis blan ki pa t janm aksepte defèt yo nan Vètyè. Papa Desalin te di n trè klè si n kite Lafrans retounen an Ayiti, se pou pwòp malè n. Ebyen, jounen jodi a, nou wè l. Apre Lafrans fin fann fwa Ayiti nan tout nivo, nonsèlman nou aksepte l kòm zanmi n, se nan lang li n ap edike pitit nou, men tou, n ap pran leson demokratik nan men l. Yon peyi malfektè, rapas tankou Lafrans, ki otorite moral li genyen pou l ta nan konsèy sekirite òganizasyon lanmò a, L’ONU , pou l ap deside pou Ayiti? Si opozisyon an dekonfiti a pa t ap betize, ki dwa Lafrans pou l ta ap mande n nekosye ak yon asasen tankou Jovenel Moïse, ki bwè san nou lè’l swaf, olye l bwè dlo tankou tout moun? Piwomann yo fin mete dife nan tout rakwen peyi a, epi y ap pran pòz ponpye yo pou vin touye dife a. Si n te koute konsèy papa Desalin yo, jounen jodi a, nou pa t ap nan latoumant sa a.

Nou tèlman pèdi bon sans nou ak diyite n, nou bliye ki moun nou ye, nou lage pwoteksyon n ak kòd trip nou nan men menm bouwo k ap teworize n depi 214 lane yo. Nou bat bravo pou yo, nou danse pou yo, nou rele yo sovè, tankou jan ayisyen nan Miami t ap pyafe pou Biden, ki sòt pase 8 lane kòm vis-prezidan Obama, ki pa t pete nan koton ba n santi. Dayè, se Obama Hillary Clinton ak Biden menm, ki te foure Ti-Simòn ak enkilpe asasen an nan gagann nou. Ki sa Biden te di pou Ayiti lè Ti-Simòn t ap komèt tout deriv li yo nan peyi a? Ki sa Biden te fè lè Kò Gang nan te kwoke enkilpe a nan tèt leta peyi nou an kòm prezidan ? Èske Biden te nan syèl la, sa k fè l pa t konnen sa k t ap pase an Ayiti? Ki sa k fè n kwè ke Biden pral chanje Ayiti pou nou? Nan 4 lane ankò, na pyafe pou yon lòt bandi meriken koken menm jan ak tout lòt yo. Depi ki lè yon prezidan demokrat, oswa yon repibliken, te janm wè pwogrè pou Ayiti ak byennèt pou ayisyen? Ak yon atitid parazit konsa, delivrans Ayiti pa pou demen. Si n pa krache kòlè n ak fraka, pou n sispann mete pansman sou maleng, nou fenk kare pran nan lòt apatrid ki chita sou ban rezèv la ap tann Etazini ba yo jwe wòl kòmandè wonflè ke enkilpe a ap jwe jounen jodi a. Pa bliye, anvayisè pa ka zanmi w. Viv tankou moun ak diyite, nan yon Ayiti lib sou tout fòm, ou lanmò pou tout konplotè ak tout machann lanmò yo!

Ekri pa
Polycarpe Le Grand Zephir
7 Oktòb 2020.

TOUT DWA REZÈVE
LE TOUT AU PLURIEL MAGAZINE.

NOU SE ZYE OU AK ZÒRÈY OU…